ბორჯღალოსნები ერთა თასის მფლობელები გახდნენ. მძიმე მატჩში საქართველოს ნაკრებმა 4 ლელოს დადება და მხოლოდ ერთი გარდასახვის გატანა მოახერხა. მატჩის საუკეთესო მოთამაშე მამუკა გორგოძე გახდა. ლობუშის პირველი ლელო დაცვაში ქართველთა შეცდომას მოჰყვა, რასაც ესპანელებმა ზუსტი გარდასახვა და კიდევ ერთი გარდასახული ლელო მიაყოლეს. ამის შემდეგ ბორჯღალოსნებმა მობილიზება და ტაიმის მიწურულს ორი ლელოს დადება შეძლეს.
მეორე ტაიმში თამაში საკმაოდ დაძაბული იყო და გარდამავალი უპირატესობით მიმდინარეობდა. საბოლოო ჯამში ქართველმა მორაგბეებმა 22 - 20 მოიგეს, ჩაიბარეს ერთა თასი და სეზონი 9 მოგებით დაასრულეს.
ტიმ ლეინის თქმით, სიურპრიზი არ ყოფილა მისთვის, როცა მეტოქემ ელვისებური იერიშებით ორჯერ დაალელოვა საქართველოს ნაკრების საჯარიმოში. ეს იმის გამო მოხდა, რომ ”ბორჯღალოსნებმა“ მოედნის ცენტრი დათმეს, რასაც ორი მიუტევებელი შეცდომა მოჰყვა და ლოგიკური შედეგიც დაფიქსირდა. ”გამოუყენებელ საჯარიმოებზე კი ვერაფერს გეტყვით, საერთო ჯამში თამაშით და შედეგით კმაყოფილი ვარ. თუმცა ეს იმას სრულებითაც არ ნიშნავს, რომ დაშვებული შეცდომები სამომავლოდ არ უნდა გავითვალისწინოთ“, - დასძინა ავსტრალიელმა სპეციალისტმა.
ესპანელთა თავკაცმა მეტოქე-გუნდს ორმაგი გამარჯვება, ამ შეხვედრაშიც და, საერთოდ, ერთა თასის გათამაშებაში მიულოცა. მან აღნიშნა, რომ ქართველი მორაგბეები იმსახურებდნენ ამ წარმატებას, რაც ჯერ კიდევ კრასნოიარსკში, რუსეთის გუნდთან შეხვედრაში დაამტკიცეს.
